Bestellings · Groottes · Aflewering · Omruilings · Betalings · Privaatheid · Kontak & vrae
Welkom by Naak.
Naak is ’n klein Suid-Afrikaanse besigheid wat plaaslike vakmanskap, handgemaakte produkte en unieke ontwerpe skep.
Ons produkte word nie in groot massaproduksielyne vervaardig nie. Party van ons produkte word selfs deur slegs een persoon van begin tot einde gemaak. Dit beteken dat daar, afhangend van die produk, ’n produksie- en wagtydperk kan wees voordat jou bestelling gereed is om na jou toe te vertrek.
Ons glo in plaaslike vakmanskap en die mense agter die produkte wat ons verkoop. Wanneer jy by Naak koop, ondersteun jy dus nie net ’n produk nie, maar ook die plaaslike mense, vaardighede en die hande daaragter.
Deur ’n bestelling op die Naak-webtuiste te plaas, bevestig jy dat jy hierdie Bepalings & Voorwaardes gelees en verstaan het.
BESTELLINGS
Aanlyn-bestellings
Jy kan jou gunsteling Naak-items direk op ons aanlynwinkel bestel naakofficial.com
Kies jou produk, grootte en enige beskikbare opsies, voeg dit by jou mandjie en volg die betaalproses.
Vir veiligheidsdoeleindes behartig ons nie bestellings via sosiale mediakanale nie. Alle bestellings moet deur ons amptelike aanlynwinkel of, waar van toepassing, direk per e-pos gereël word.
Sodra jou bestelling suksesvol geplaas is, ontvang jy ’n bewys van bestelling per e-pos.
Jou bestelling word daarna gedurende die toepaslike produksietydperk vervaardig en met sorg voorberei.
Sodra jou bestelling klaar is en aan die koerier oorhandig word, ontvang jy ’n e-pos met jou naspeurnommer.
Jy hoef dus nie bekommerd te wees indien jy nie gedurende die produksietydperk voortdurend van ons hoor nie — jou bestelling is in produksie en ons is besig om dit vir jou mooi te maak.
Bestellings kan ongelukkig nie verander word nadat die bestelling geplaas is nie.
Bestellings kan ongelukkig nie gekanselleer word nadat dit in produksie gegaan het nie.
Spesiale bestellings & aanpassings
Party Naak-produkte kan, waar moontlik, in ’n ander kleur, grootte of spesifikasie vervaardig word.
Dit hang af van die ontwerp, beskikbaarheid van materiaal, vervaardigingsproses en die spesifieke produk.
Vir ’n spesiale bestelling waar die ’custom’-opsie nie duidelik is op die produkbladsy nie, stuur gerus vir ons kantoor ‘n e-pos by info@naakofficial.com
Spoedbestellings
Ons bied, waar moontlik, ’n Spoedbestelling (Rush Order)-opsie.
Indien jy jou bestelling dringend benodig, kontak ons asseblief voor jy jou bestelling plaas, sodat ons jou sperdatum kan bespreek en bevestig of ons dit kan akkommodeer.
’n Ekstra fooi van R240 is van toepassing op ’n Spoedbestelling.
Die bestelling word uit ons normale produksieskedule gehaal en apart, met voorkeur en buite die normale produksieskedule hanteer. Dit word ook per spoedkoerier na ons pakhuis gestuur om te help verseker dat dit so vinnig moontlik by jou uitkom.
Die R240-fooi dek die bykomende produksie- en koerierkoste wat met ’n Spoedbestelling gepaardgaan.
Spoedbestellings is onderhewig aan produksievermoë, beskikbaarheid, materiaalbeskikbaarheid en die spesifieke sperdatum.
Ons sal jou vooraf laat weet of ons die verlangde datum kan akkommodeer. Alhoewel ons alles moontlik doen om jou bestelling betyds te lewer, kan ons ongelukkig nie ’n spesifieke afleweringsdatum waarborg nie omdat ons steeds afhangklik is van die produksiespan / fabriek.
GROOTTES:
Kledingstuk groottes:
Maak gerus gebruik van ons groottegids. Ons kledingstukke se mates is baie standaard en nie ‘n kleiner maak soos bv klere wat ingevoer word nie.
By sekere kledingstukke kan jy gebruik maak van ons GRATIS NOMMERPAS-OPSIE.
Wanneer jy hierdie opsie kies, word jou kledingstuk volgens jou persoonlike mates vervaardig.
Ons gebruik die mates wat jy aan ons verskaf om jou patroon spesifiek vir jou te gradeer, waarna jou kledingstuk volgens jou persoonlike mates vervaardig word.
Maak asseblief seker dat jou mates korrek is voordat jy jou bestelling plaas. Die kledingstuk word volgens die mates wat jy aan ons verskaf, gemaak. Verkeerde mates kan dus tot ’n verkeerde pasvorm lei.
Indien jy onseker is oor hoe om jouself korrek te meet, stuur gerus ’n e-pos aan info@naakofficial.com. Ons help jou met liefde!
Skoengroottes
Ons raai jou aan om jou normale SA/UK-skoengrootte te bestel.
Naak-skoene word plaaslik vervaardig en met die hand gemaak volgens standaard SA/UK-skoenleeste. Ons groottes is dus oor die algemeen getrou aan ’n normale skoengrootte.
Jy hoef gewoonlik nie ’n grootte groter of kleiner te bestel nie.
Indien jy normaalweg ’n grootte 5 dra, sal ons byvoorbeeld ’n grootte 5 aanbeveel.
Indien jy tussen twee groottes is, stuur gerus ’n e-pos aan info@naakofficial.com met die naam van die skoen wat jy in gedagte het. Ons kan jou dan help met die toepaslike mates vir daardie spesifieke styl.
Ons het die voetmates van die webtuiste verwyder omdat ons gevind het dat mense hul voete effens verskillend meet, wat maklik tot verwarring kan lei.
Ons help jou dus eerder persoonlik om seker te maak jy kies die regte grootte.
PRODUKSIE TYDPERK
Baie van Naak se produkte word spesiaal vir jou vervaardig en nie uit groot voorraad gehaal nie. Ons werk met klein plaaslike vervaardigers, produksiespanne en individuele ambagslui eerder as groot massa-produksielyne.
Die toepaslike produksietydperk word, waar van toepassing, op die spesifieke produkblad aangedui.
Kledingstukke
Ons kledingstukke word deur ons toegewyde produksiespan in Durbanville vervaardig.
’n Naak-kledingstuk kan tot en met 15 werksdae neem om te vervaardig.
Indien jy gebruik maak van ons GRATIS NOMMERPAS, waar ’n kledingstuk spesiaal volgens jou persoonlike mates vervaardig word, kan produksie tot en met 25 werksdae neem.
Vir sekere spesiale of pasgemaakte kledingstukke kan ’n langer produksietydperk van toepassing wees.
Skoene
Ons skoene word met die hand uit egte leer vervaardig.
Ons skoene word plaaslik met groot aandag aan detail vervaardig in Stellenbosch, Durbanville en Johannesburg.
Skoene neem gewoonlik ongeveer 2–4 weke, maksimum 25 werksdae om te vervaardig. Die spesifieke produksietydperk vir elke skoenstyl word op die toepaslike produkblad aangedui.
Ons werk op die maksimum produksietydperk wat die fabriek aan ons gee, om verwagtinge te bestuur en teleurstelling te voorkom.
Omdat ons met klein plaaslike vervaardigers, produksiespanne en individuele ambagslui werk, kan onverwagte produksievertragings soms voorkom. Indien daar ’n beduidende vertraging in die vervaardiging van jou bestelling is, sal ons jou waar moontlik daarvan in kennis stel.
VERSENDING & AFLEWERING
Ons posduif se naam is The Courier Guy — en dié posduif vlieg sommer landswyd!
Ons stuur jou Naak-pakkie met liefde tot reg by jou voordeur, waar jy ook al in Suid-Afrika woon, teen ’n vaste afleweringsfooi van:
R140 per pakkie
Die grootte van jou pakkie maak geen verskil aan die standaard afleweringsfooi nie.
The Courier Guy kan ongelukkig nie by plase of informele nedersettings aflewer nie.
Maak asseblief seker dat jy ’n fisiese straatadres verskaf waar die koerier veilig kan aflewer.
Die R140-afleweringsfooi geld vir standaard aflewerings binne Suid-Afrika.
In sekere gevalle kan The Courier Guy ’n bykomende toeslag hef vir aflewerings na gebiede wat as hoërisiko- of gevaarlike gebiede geklassifiseer word.
Indien ’n ekstra koerierfooi deur The Courier Guy gehef word weens die ligging van die afleweringsadres, behou Naak die reg voor om hierdie addisionele koste aan die kliënt deur te gee.
Die afleweringstydperk begin eers nadat jou bestelling vervaardig en gereed is om aan die koerier oorhandig te word.
Aflewerings na kleiner dorpe, plattelandse gebiede en/of afgeleë adresse kan langer neem.
Aflewering kan ook beïnvloed word deur faktore buite Naak se redelike beheer, insluitend openbare vakansiedae, naweke, logistieke uitdagings, industriële aksie, koeriervertragings en die ligging van die afleweringsadres.
Sodra jou bestelling aan The Courier Guy oorhandig word, ontvang jy ’n e-pos van ons met jou naspeurnommer.
Met jou naspeurnommer kan jy jou pakkie se reis volg.
Neem asseblief kennis dat dit soms tot 24 uur kan neem voordat die versendingbesonderhede op die koerier se stelsel verskyn of begin opdateer. Moet dus nie bekommerd wees as jy nie dadelik beweging sien nie — jou pakkie is wel op pad!
Van hier af hanteer die koerier die verdere aflewering.
Indien jy graag wil weet waar jou pakkie op enige stadium is, ’n spesiale afleweringsreëling wil tref, of byvoorbeeld jou pakkie na ’n oornagdiens wil verander, sal jy asseblief direk met The Courier Guy kontak maak en dit met hulle reël. Hulle sal dan die beste kan help met enige spesifieke afleweringsversoeke of veranderinge.
Ons wil jou natuurlik graag help waar ons kan, maar sodra jou pakkie aan die koerier oorhandig is, is enige verdere opvolg, afleweringsreëlings of veranderinge ongelukkig in hul hande.
Ons wil ook net vriendelik noem dat Naak ongelukkig nie verantwoordelikheid kan aanvaar vir enige vertragings, probleme of veranderinge wat ná die oorhandiging deur die koerier ontstaan nie. Ons sal natuurlik altyd probeer help waar ons kan indien daar enige navrae is.
Jou afleweringsadres
Dit is die kliënt se verantwoordelikheid om seker te maak dat die volledige en korrekte afleweringsadres tydens checkout verskaf word.
Naak kan nie verantwoordelik gehou word vir ’n vertraging of ekstra koste wat ontstaan omdat ’n verkeerde, onvolledige of ongeskikte afleweringsadres verskaf is nie, behoudens enige regte wat ingevolge toepaslike wetgewing mag geld.
Internasionale versending
Naak kan internasionaal versend.
Enige toepaslike invoerbelasting, doeanegelde of ander koste wat deur die bestemmingsland gehef word, moet deur die kliënt betaal word.
OMRUILINGS & TERUGBETALINGS
Ons wil jou graag help om enige omruiling of terugstuur so maklik en glad as moontlik te laat verloop.
Alle omruilings en terugsendings moet vooraf per e-pos met Naak gereël word.
Moet asseblief geen produk terugstuur voordat jy eers met ons kantoor kontak gemaak het en ons die terugstuur goedgekeur en gereël het nie. Pakkies wat sonder vooraf reëling teruggestuur word, kan nie noodwendig aanvaar of verwerk word nie.
Stuur asseblief jou versoek na:
info@naakofficial.com
Om ons te help om jou versoek so vinnig moontlik te hanteer, sluit asseblief die volgende in:
Jou bestelnommer
Jou volle naam
Die rede vir die omruiling
Enige relevante foto’s of verdere inligting
Ons sal jou versoek daarna beoordeel en, waar van toepassing, vir jou die nodige terugstuurinstruksies en korrekte terugstuuradres verskaf.
Wag asseblief vir ons bevestiging voordat jy jou produk terugstuur.
Onthou die onus rus op die kliënt om die posdiens fooi te dek.
Vereistes vir ’n gewone omruiling
Vir ’n gewone vrywillige omruiling moet:
die produk ongebruik wees;
die produk in dieselfde toestand wees waarin jy dit ontvang het;
die produk nie gewas, verander of beskadig wees nie;
’n geldige aankoopbewys of ordernommer beskikbaar wees; en
die versoek binne die toepaslike 30-dae-periode gemaak word.
Produkte wat nie vir ’n gewone omruiling kwalifiseer nie
Sekere van ons leerskoene, handsakke en ander produkte word uit egte leer vervaardig.
Omdat egte leer ’n natuurlike materiaal is, kan daar klein variasies in kleur, tekstuur, grein, patroon en afwerking voorkom.
Hierdie variasies is ’n natuurlike eienskap van egte leer en beteken dat elke produk effens uniek kan wees.
’n Natuurlike variasie in egte leer word nie op sigself as ’n vervaardigingsfout beskou nie.
Kledingstukke wat spesiaal volgens jou persoonlike mates vervaardig is, kwalifiseer nie vir ’n gewone omruiling of terugstuur bloot omdat jy van plan verander het of die item nie pas soos jy verwag het nie.
Skoene wat spesiaal volgens jou persoonlike mates, ’n spesifieke kleur of ’n spesiale styl vervaardig is, kwalifiseer nie vir Naak se gewone vrywillige omruilingsbeleid nie.
Baba- en kinderskoene word spesiaal op bestelling vervaardig en kwalifiseer nie vir Naak se gewone vrywillige omruilingsbeleid nie.
Skoengroottes 2, 3 en 9 kwalifiseer nie vir Naak se gewone vrywillige grootte-omruilings nie, aangesien ons nie standaardvoorraad in hierdie groottes dra.
Produkte wat teen ’n afgemerkte prys of winskopieprys gekoop word, kwalifiseer nie vir Naak se gewone vrywillige omruiling vir ’n ander grootte, produk of winkelkrediet nie.
Terugbetalings
Indien ’n gewone vrywillige terugbetaling goedgekeur word, word die terugbetaling op die toepaslike oorspronklike aankoopbedrag bereken.
Die oorspronklike versendingskoste word nie terugbetaal vir ’n gewone verandering-van-gedagte-terugstuur nie.
Waar toepaslik, kan versendingskoste van die terugbetalingsbedrag afgetrek word.
Terugbetalings word, waar moontlik, na die oorspronklike betaalmetode verwerk.
In sekere gevalle kan ’n gedeeltelike terugbetaling oorweeg word waar die produk nie in dieselfde toestand teruggestuur word waarin dit ontvang is nie, byvoorbeeld waar dit duidelike tekens van gebruik toon of deur die kliënt beskadig is.
Hierdie bepalings beperk nie enige statutêre regte wat ’n verbruiker met betrekking tot ’n gebrekkige of nie-konformerende produk mag hê nie
Beskadigde of foutiewe produkte
Indien jy ’n produk ontvang wat sigbaar beskadig of foutief is, kontak ons asseblief so gou moontlik en, waar moontlik, binne 48 uur nadat jou bestelling afgelewer is.
Die 48-uur-aanmeldingsperiode help ons om enige skade wat tydens vervoer of aflewering plaasgevind het, vinnig te ondersoek.
Stuur asseblief jou naam en van, ordernommer, duidelike foto’s van die produk en die skade of fout, asook enige ander relevante inligting.
Skade wat ontstaan as gevolg van normale slytasie, verkeerde gebruik, verkeerde hantering, ongelukke of veranderinge aan die produk deur die kliënt, word anders hanteer as ’n vervaardigingsfout.
AANLYN BETALINGS:
Ons bied veilige en gerieflike betaalopsies tydens die checkout-proses.
PayFast is ’n eksterne betaaldiens wat gebruik word om aanlyn betalings te verwerk.
Ons bied ook Payflex en PayJustNow, waar jy jou produkte in rentevry paaiement kan afbetaal.
Indien jy nie van die eksterne aanlyn betaalfasiliteite gebruik wil maak nie, is jy welkom om ’n bestelling direk per e-pos by ons te plaas. Ons kan dan vir jou ’n faktuur met die nodige betalingsbesonderhede opstel.
Sodra jou betaling suksesvol verwerk is, ontvang jy per e-pos ’n bevestiging van jou bestelling en betaling.
Ons neem die veiligheid van jou persoonlike inligting ernstig.
Persoonlike inligting en sensitiewe betalingsinligting word deur veilige betaalstelsels en toepaslike sekuriteitsmaatreëls hanteer.
PRODUK VERSORGING
Versorging van jou produkte
Kledingstukke moet met koue water met die hand gewas word.
Leerskoene kan met ’n deursigtige leerpolitoer behandel word. Skaaf merke kan versigtig met ’n uitveër of ’n warm, klam lappie verwyder word.
WEBWERF, PRIVAATHEID & SOSIALE MEDIA
Lees asseblief hierdie beleid sorgvuldig deur om ’n duidelike begrip te kry van hoe Naak met kliënte, verskaffers, herverkopers en sosiale media omgaan, asook hoe ons persoonlike inligting versamel, gebruik en beskerm.
Privaatheid
Wanneer jy op ons webtuiste bestel, ’n vorm invul, aan ’n opname deelneem, vir kommunikasie inteken of die webtuiste gebruik, kan ons persoonlike inligting versamel wat nodig is om jou bestelling te verwerk, jou te kontak, produkte te lewer en ons dienste te verbeter.
Ons doen redelike moeite om persoonlike inligting veilig te bewaar en toegang daartoe te beperk tot persone wat dit vir hul werksverantwoordelikhede benodig.
Waar toepaslik, kan ons cookies en soortgelyke tegnologieë gebruik om jou voorkeure te onthou, bestellings te verwerk, webwerfverkeer te verstaan en die gebruikerservaring te verbeter.
Werknemers & Respek
Naak is daartoe verbind om ’n veilige en professionele werksomgewing te handhaaf waarin werknemers met waardigheid en respek behandel word.
Ons duld geen vorm van onwettige diskriminasie, afknouery, haatspraak, teistering, dreigemente of intimidasie teenoor ons werknemers nie — hetsy persoonlik, telefonies, per e-pos of aanlyn.
Ons verwag dieselfde respek van kliënte, verskaffers, herverkopers en enige ander persoon of entiteit wat met Naak omgaan.
Sosiale Media
Ons verwelkom gesprekke, terugvoer en interaksie op ons sosiale mediaplatforms. Ons duld egter nie rassistiese, diskriminerende, haatdraende, seksueel-onwelkome, dreigende of teisterende kommentaar, boodskappe of gedrag nie.
Ons behou die reg voor om enige sodanige inhoud te verwyder en, waar nodig, verdere stappe te neem om ons werknemers en besigheid te beskerm.
Indien ’n persoon of entiteit herhaaldelik ons werknemers of besigheid aan afknouery, teistering, haatspraak, dreigemente of ander onaanvaarbare gedrag onderwerp, behou Naak die reg voor om verdere kommunikasie of transaksies met daardie persoon of entiteit te beëindig, onderhewig aan enige regte wat die persoon ingevolge toepaslike wetgewing mag hê.
Ons glo in deursigtigheid, professionaliteit, eerlikheid en opregtheid. Ons verwelkom jou by Naak — aanlyn of in persoon — met ’n oop hart, ’n hartlike glimlag en diens waarop ons trots is.
ONS LAATSTE BELANGRIKE NOTA
Elke Naak-produk het sy eie storie.
Ons produkte word nie in groot hoeveelhede uit ’n massa-produksielyn gerol nie.
Baie van hulle word plaaslik, met die hand en spesiaal vir jou gemaak.
Party word selfs deur een persoon van begin tot einde vervaardig.
Dit beteken soms dat jy ’n bietjie langer moet wag — maar dit beteken ook dat daar ’n mens, ’n hand en baie liefde agter jou bestelling is.
Dankie dat jy Naak kies.
Dankie dat jy plaaslik koop.
En dankie dat jy vir die mooi dinge wag.
NAAK
Suid-Afrikaans. Plaaslik. Met liefde handgemaak.
Met liefde uit die oudedooss